A Comisión Europea ven de propoñer a creación de dúas grandes «autoestradas enerxéticas» que atravesan España: unha nova interconexión eléctrica con Francia e un corredor de hidróxeno renovable que conectará Portugal con Alemaña. Estas infraestruturas forman parte dun paquete estratéxico co que Bruxelas busca modernizar as redes enerxéticas, reducir as facturas e reforzar a independencia enerxética de Europa.
A mensaxe política é clara: Europa non pode ser competitiva, resiliente nin xusta sen un sistema enerxético limpo, interconectado e preparado para integrar grandes volumes de enerxías renovables. Para iso, a Comisión propón acelerar permisos, priorizar proxectos estratéxicos e multiplicar o investimento en redes enerxéticas ata alcanzar os 30.000 millóns de euros no próximo marco financeiro.
Con todo, esta transformación non se limita ás grandes infraestruturas transfronteirizas. A modernización das redes e a redución dos prazos administrativos abren unha oportunidade real para un modelo enerxético máis distribuído, onde a cidadanía, os municipios e o tecido local poidan participar activamente na produción e xestión da enerxía.
Neste contexto, as Comunidades Enerxéticas Locais deixan de ser iniciativas illadas para se converteren nunha peza crave do novo sistema enerxético europeo. Permiten que a enerxía renovable se prodúza e consúma no territorio, fortalecen a autonomía local e contribúen a unha transición enerxética máis xusta e participativa.
𝗖𝗢𝗠𝗘𝗡𝗘𝗥𝗚 traballa precisamente nese punto de conexión entre a estratexia europea e a realidade local. Mentres Europa impulsa grandes corredores enerxéticos para eliminar estrangulamentos históricos, proxectos como COMENERG acompañan aos territorios —especialmente en zonas rurais e transfronteirizas— para que a transición enerxética chegue ás persoas e se constrúa desde o local.
A transición enerxética non é só unha cuestión de grandes infraestruturas. É tamén unha cuestión de gobernanza, participación cidadá e xustiza enerxética. E nese camiño, as comunidades enerxéticas locais teñen un papel protagonista.
